O vicepresidente segundo e conselleiro de Presidencia, Xustiza e Deportes, Diego Calvo, visitou hoxe xunto coa delegada territorial da Xunta en Ferrol, Martina Aneiros, o Club Náutico Firrete, unha das 97 entidades beneficiarias da orde de axudas para a adquisición de equipamentos deportivos destinados á clubs e federacións deportivas.
A Xunta destina a esta convocatoria 700.000 euros, aos que se suman outros 2 millóns doutra orde dirixida ao desenvolvemento de actividades deportivas por parte de clubs e núcleos de adestramento deportivos, e de sociedades anónimas e seccións deportivas que, como anunciou tamén Calvo, se resolverán en breve. Polo tanto, o investimento total acada os 2,7 millóns.
Ademais destas dúas liñas de axudas, a Administración autonómica mantén o seu compromiso co deporte co patrocinio de eventos, de equipos e de deportistas de alto nivel.
A orde de subvencións para equipamento deportivo achega aos beneficiarios material específico destinado á participación en competicións deportivas oficiais ou á realización de adestramentos, material non específico como transporte ou equipamento de ximnasio e material sanitario.
O CN Firrete de Pontedeume, recibiu unha achega de 10.000 euros –a contía máxima por entidade– que se investirán na compra dunha embarcación, unha máquina elíptica, un desfribilador e unha caixa de primeiros auxilios.
Entre os conceptos financiados inclúense seguros, inscricións en competicións e os seus gastos de transporte, manutención e aloxamento en eventos; arbitraxes; aluguer de instalacións; así como produtos sanitarios, gastos de ambulancias ou relacionados coa prevención e a seguridade.