Nun emocionante cruce entre natureza, deporte e apoderamento, a granxa ecolóxica galega Casa Grande de Xanceda uniu forzas co equipo feminino do Abellá SDC nunha iniciativa que dá visibilidade ao esforzo das nenas e mulleres que practican fútbol no rural galego.

O vídeo da acción "As do Rural Xogan", gravado entre vacas, botas e iogures, amosa como as xogadoras adestran, soñan e medran nun entorno que a miúdo queda fóra do foco mediático do mundo urbano. Dende o corazón de Galicia, as futbolistas e a granxa quixeron lanzar unha mensaxe rotunda: o talento feminino tamén se cultiva no rural, con traballo, ilusión e apoio mutuo.

“Queremos amosar que as rapazas do rural tamén xogamos, tamén competimos, tamén soñamos. E dende aquí, dende un pequeno campo en Mesía, tamén se pode construír futuro para o deporte feminino”, afirma unha das xogadoras do Abellá SDC.

Desde Casa Grande de Xanceda explican que a acción se enmarca no seu “compromiso cunha sociedade máis igualitaria”. Desde a marca afirman que “o empoderamento feminino non é só unha palabra bonita: é apostar de verdade por quen o ten máis difícil. No rural hai moitísimo talento feminino, tamén no deporte. Queremos ser altofalante diso”, explican. Por ese motivo, a granxa será patrocinadora do Abellá SDC feminino na tempada 2025-2026, tanto nas súas camisetas como no campo. “Apostamos polo Abellá porque é o equipo feminino rural da nosa contorna máis próxima”, din.

Ademais de visibilizar o esforzo destas mozas deportistas, a acción serve para enviar unha mensaxe de ánimo á Selección Española feminina, no seu camiño cara á Eurocopa 2025, porque as súas xogadoras son “inspiración para todas as que apostan por este deporte tradicionalmente masculino”: "Dende o rural galego: a por a Euro, campioas!".

Con esta colaboración, Casa Grande de Xanceda reafirma a súa aposta por unha Responsabilidade Social Corporativa con raíces, onde o desenvolvemento rural, a igualdade e o coidado da contorna se entrelazan.