lunes 23/11/20

Nova resolución para os usos das instalacións deportivas

Mónica Martínez: “Fai catro anos que non se consegue resolver esta convocatoria”
Imaxe de arquivo do Palacio dos Deportes de Riazor durante unha competición de patinaxe	| quintana
Imaxe de arquivo do Palacio dos Deportes de Riazor durante unha competición de patinaxe | quintana

O Concello, a través da área de Deportes, resolve definitivamente a convocatoria de usos das instalacións deportivas municipais despois de catro anos de parálise administrativa. Dende onte, data da resolución, as entidades solicitantes poderán utilizar as instalacións deportivas municipais para realizaren adestramentos, sempre e cando presenten a documentación requirida na convocatoria e cumpran cos protocolos de prevención da COVID-19.

A concelleira de Deportes, Mónica Martínez, sinalou que “fai catro anos que non se consegue resolver esta convocatoria” e que agora “entrarán a adestrar clubs que o estaban demandando desde hai anos, posto que a distribución dos usos levaba prorrogada dende o ano 2016”.

En total, o Goberno local puxo á disposición das entidades deportivas da cidade 52 instalacións de dominio municipal, con máis de 600 franxas horarias ao longo da semana. Canto ás entidades que realizan deporte federado, poderán empregar estas instalacións de xeito gratuíto. Martínez asegura que se atenderon “131 solicitudes, das cales 101 corresponden a solicitudes de clubs e federacións para practicar deporte federado” e que as 30 restantes, “son de entidades e clubs non federados e academias de formación que precisan recintos deportivos para as probas de acceso a corpos especiais”. En total, pasarán a adestrar semanalmente nas instalacións deportivas municipais 20.500 deportistas, das cales cerca de 5.000 son mulleres e 14.000 son menores de idade.

O Concello da Coruña está realizando un grande esforzo por dotar de máis instalacións deportivas municipais a cidade, “con grandes proxectos que se iniciarán en 2021, como é unha nova piscina, a ampliación do rocódromo de Riazor ou polideportivos multideporte, entre outras”, apuntou a edila de Deportes. “A convocatoria segue viva, por tanto, as horas que vaian quedando libres ao longo da tempada pódenas solicitar os clubs que así o necesitaren”. Ademais, as horas que non se ofertaron quedan reservadas para uso da concellaría de Deportes.

Comentarios