miércoles 18.09.2019

Nace o torneo do Camiño

A Xunta de Galicia presenta unha novedosa competición dentro do programa ‘O teu Xacobeo’ que se vai celebrar en Vigo e na que estarán Deportivo e Ural como representantes coruñeses
O Deportivo será un dos equipos participantes na competición autonómica | aec
O Deportivo será un dos equipos participantes na competición autonómica | aec

José Ramón Lete, secretario xeral para o Deporte, presentou onte o Torneo de categoría alevín ‘Fútbol no Camiño’ do CD Sampayo dentro do programa ‘O teu Xacobeo’ da Xunta.

Este programa responde á maior convocatoria aberta da historia de Galicia con máis de 350 proxectos aprobados e un investimento de case cinco millóns de euros que “beneficiarán a cidadáns e entidades de toda a comunidade, tamén a través da práctica deportiva, impulsando un Ano Santo 2021 que será o mellor para Galicia e para Vigo”, explicou.

“Desde a Xunta apostamos por  cohesionar, por xerar comunidade e por fortalecer os lazos que unen a todos os galegos, e aos galegos co resto do mundo”, engadiu. 

O secretario xeral lembrou que Vigo é –con 730.000 euros na última tempada e sete millóns nos últimos 10 anos para clubs– “a cidade galega que máis investimento recibe da Xunta de Galicia para a súa actividade deportiva”. Vigo conta, dixo, con “centenares de clubs e de equipos, moitos deportistas e directivos, eventos deportivos, que estenden pola cidade hábitos de vida activos e saudables,  promotores dun Vigo e dunha Galicia máis deportivas, máis modernas e mellores”.

Do mesmo xeito, o secretario xeral destacou a aposta da Xunta polo deporte base como demostra cada ano no seu programa Xogade que xunta toda a oferta deportiva en idade escolar (federada e non federada) promovida polo Goberno galego. A Xunta de Galicia contou na tempada 2018-2019 con 128.586 nenos e nenas mutualizados. 

O Torneo de ‘Fútbol no Camiño’ celebrarase o 14 e o 15 de setembro no Campo de Fútbol Federativo de Coia (Vigo). Agárdanse unhas 700 persoas que asistirán ao torneo e entre os equipos participantes  estarán o Deportivo e o Ural como representantes coruñeses.

Comentarios