Uxío Abuín (Olímpico de Vedra) logrou a medalla de prata na Copa de Europa de Quarteira nun emocionante final. Pola súa banda, Andrés Cendán (Cidade de Lugo Fluvial) ocupou a 21ª posición, mentres que Alberto Castiñeira (Tríatlon Arteixo) foi 32º.

O dodrense estivo moi ben posicionado na proba dende o inicio. Á saída da auga tras realizar os 1.500 metros de natación, Uxío estaba a 8 segundos escasos dos líderes e con opcións a todo. Por detrás, os outros dous galegos, pero a menos de 30 segundos.

A bicicleta foi decisiva xa que se formou un grupo duns vinte deportistas, cos principais favoritos para loitar polo podio. No grupillo estaban Benson, Uxío, Pereira, Coninx, Raso ou Montiel, entre outros. Mentres, Castiñeira e Cendán estaban no segundo grupo a 1:30.

Así, os 10 quilómetros de carreira a pe presentábanse moi emocionantes, con grandísimos triatletas na loita. E non decepcionaron cun final apoteósico cos tres primeiros en só sete segundos. Joao Pereira logrou o triunfo en casa cun tempo de 1h.48:44, con Uxío Abuín na segunda posición (1h.48:50) e Dorian Coninx (1h.48:51), terceiro.

Con respecto aos outros dous galegos presentes en Quarteira, sinalar que Andrés Cendán chegou na 21ª posición cun tempo final 1h.52:22, mentres que Alberto Castiñeira rematou no posto 32º (1h.53:19).