O presidente da Deputación da Coruña, Valentín González Formoso, e o reitor da Universidade da Coruña, Julio Abalde, asinaron un convenio para o financiamento das obras de renovación da pista de atletismo e o complexo deportivo do Campus de Elviña.
A institución provincial destinará 200.000 euros, o cal supón preto do 42% do custo total das obras, co obxectivo garantir as condicións de seguridade e comodidade necesarias para o seu uso en adestramentos e eventos deportivos vinculados a distintas disciplinas relacionadas co atletismo, coma carreiras, salto de altura, con pértega ou de lonxitude.
Formoso e Abalde coincidiron en destacar a "necesidade" deste investimento para mellorar unha infraestutura deportiva que actualmente conta cun visible desgaste e subliñaron que da súa mellora se beneficiarán "tantos os universitarios como as entidades deportivas coruñesas".
As obras, que se realizarán durante o verán, consistirán na renovación dos firmes da pista de atletismo en todo o anel, cunha técnica denominada 'retoping'. Este proceso inclúe o pulido e a descontaminación de toda a superficie. Posteriormente, aplicaranse resinas de poliuretano para reparar as zonas deterioradas e lixarase de novo a superficie.
En paralelo, construirase un novo acceso ao complexo deportivo do Campus, situado baixo as gradas das pistas. Na actualidade, só existe unha entrada a través do peche perimetral do recinto. O novo acceso será unha escaleira na fachada suroeste, cuberta cunha pérgola, e dotada de acristalamento perimetral. Ademáis, eliminaránse as barreiras arquitectónicas, favorecendo o acceso a usuarios con mobilidade reducida.
