Preto de 900 persoas déronse cita no salón Museo da Cidade de Cultura de Galicia, en Santiago, para asistir a unha nova edición da gala do fútbol galego, a única que abrangue a todos os estamentos e especialidades do noso fútbol.
Unha festa de todos que contou coa presenza dos secretarios xerais de Deportes, José Ramón Lete, e de Política Lingüística, Valentín García, da concelleira de Deportes de Santiago, Esther Pedrosa, do deputado de Deportes da Deputación da Coruña, Antonio Leiras, de presidentes de clubs e de diferentes personalidades.
Unha gala presentada polos xornalistas deportivos Paula Montes e César Méndez e amenizada pola banda musical Cachas&Cousins, de Santiago, e polo humorista Oswaldo Digón.
A Real Federación Galega de Fútbol aproveitou esta celebración para realizar unha serie de distincións especiais, sendo a principal novidade desta edición a recuperación da entrega das Medallas ao Mérito Deportivo da Federación.
Recibiron a medalla de ouro o Deportivo Abanca e as medallas de prata, Lis Franco e Manuel Mosquera, entre outros. O Oza Juvenil SD, pola súa labor no fútbol base, Eligio Nogueiras, do Marino CF, premio ‘Toda unha vida’, o Laracha CF, premio Quinocho á deportividade, e Edu Expósito, mellor xogador do Deportivo, foron outros premiados de índole coruñesa.
