A irmandiña está na gran final. A Selección Galega sacou todo o seu arsenal e completou a primeira fase da misión. O elenco que dirixe Iván Cancela desfíxose na primeira semifinal desta Fase Final da Copa das Rexións UEFA de Baleares (4-1) nun encontro no que os nosos se mostraron moi superiores desde o minuto 15 da primeira parte. Galicia competiu ás mil marabillas e xa pensa na cita histórica de esta mañá ante Andalucía.
Un dos grandes protagonistas do choque foi Martín Lamelas, autor das dúas primeiras dianas de Galicia na semifinal. Con todo, e nomes propios aparte, os de Iván Cancela volveron tirar de repertorio para asinar unha vitoria coral. A importancia do colectivo levou aos nosos ao primeiro obxectivo.
O primeiro cuarto de hora foi moi igualado e o primeiro en avisar foi o bloque balear por medio de Cristian Terán, aínda que apareceu David Cortegoso para abortar a primeira chegada visitante. Corría por aquel entón o minuto 11 do envite. Neste xusto momento empezaron a crecer os nosos. A réplica chegou 60 segundos máis tarde cun disparo de Samu desde fóra da área que a punto estivo de sorprender ao gardameta balear. E no minuto 16 volveu avisar Galicia tras unha gran combinación entre Adri Castro e Yelco, malia que o disparo do futbolista galego marchou por riba do longueiro da meta balear.
Foi o preludio do primeiro gol dos nosos, que chegaría no minuto 32 obra de Martín Lamelas. Carlos López asistiu no segundo pau coa cabeza e ao alimón entre Lamelas e Adri Castro puxeron por diante a Galicia.
Importante
O 1-0 abriu a Galicia a porta cara á gran final e con este resultado chegouse ao descanso. Tras o paso polos vestiarios volveu aparecer Martín Lamelas na primeira acción ofensiva do segundo período para dinamitar a semifinal. O habilidoso futbolista galego puxo terra polo medio cunha poutada seca e rasa desde dentro da área. Marcaba o crono o minuto 47 do enfrontamento.
Os de Iván Cancela eran donos e señores do choque e o preparador galego aproveitou o marcador para rotar pensando na gran final de mañá. O 3-0 chegou no 59 nunha acción a pelota parada. Iago López anotaba o terceiro tanto galego ao cabecear no segundo pau un servizo desde a esquina. O partido foi perdendo ritmo co paso dos minutos. Baleares fixo un ademán de meterse no partido co 3-1 obra de Borja Gurrionero no minuto 72. Con todo, Iker Hurtado, o pichichi da Terceira Galega, acabou con calquera esperanza de remontada balear dous minutos máis tarde ao marcar o 4-1 no man a man co gardameta de Baleares.
