O secretario xeral para o Deporte, José Ramón Lete Lasa, presentou onte na Expourense, o XXX Campionato Master indoor, que se celebrará na pista de Ourense nos días 8, 9 e 10 de marzo.
O responsable do Deporte galego destacou a importancia dos atletas máis experimentados que xunto co deporte base e a alta competición representan as tres idades da actividade física.
“Deportistas que xa non están na súa plenitude física, pero que seguen a ser exemplo e modelo a seguir para os máis novos por representar valores tan importantes como constancia, traballo, esforzo, sacrificio ou superación”, engadiu o dirixente.
De noventa anos
Lete Lasa fixo referencia ao deportista de maior idade que participará no campionato, Antonio Marqués Blanco, que mañán cumprirá 90 anos, así como ao galego más veterán, que é Antonio Cabana Orosa que tres días despois cumprirá 81. Eles representan, dixo o secretario xereal para o Deporte, “o que todos e todas queremos chegar a ser, persoas cheas de enerxía que conta cunha saúde de ferro despois de tantas décadas de vida”.
Ao fío desta idea, o mandatario galego destacou a importancia de dous programas da Secretaría Xeral para o Deporte como son o Plan Galicia Saudable, que fai fronte ao aumento de mortes, enfermidades e discapacidades provocadas polo sedentarismo e a práctica insuficiente de actividade física, así como o Programa Xogade que xunta toda a oferta lúdica e deportiva en idade escolar promovida pola Xunta de Galicia.
O titular de Deporte Galego enumerou algúns datos xerais como os 1.673 atletas inscritos na competición. Do total, o 33% son mulleres (546) e o restante 67%, homes (1.127). Galicia é a segunda comunidade, tras Madrid, que achega á competición maior número de atletas (303) dos que o 40% son mulleres (119) e o restante 60%, homes (184). Algo similar, dixo o secretario xeral, ocorre coas licenzas coas que conta a Federación Galega de Atletismo, “das 7.291 licenzas, 3.060 (42%) corresponden a mulleres e 4.231 (58%) a homes”.
Lembranza histórica
Na semana da muller, Lete Lasa fixo un chamamento a todas as deportistas para que se animen a practicar o deporte de competición e que acheguemos cada vez máis as cifras de deporte feminino ás de deporte masculino. Neste sentido lembrou a historia de Kathrine Switzer, a primeira muller que correu o maratón de Boston en 1967 cando estaba destinada exclusivamente aos homes. “Grazas á valentía de Kathrine, hoxe podemos celebrar grandes xestas como a de Ana Peleteiro, que vén de proclamarse campioa de Europa indoor acadando a mellor marca española de todos os tempos”, sentenciou.
Por último, Lete agradeceu a todas as administracións e á Federación o seu traballo por facer posible que “unha das tres mellores pistas de atletismo cuberta que ten España se encha con contido deportivo que estea á altura da súa calidade”. Deste xeito destacou a compatibilidade de usos e a versatilidade das infraestruturas deportivas de Galicia.