Os clubs galegos con equipos en Segunda División B, Terceira División, División de Honor Xuvenil e Liga Nacional Xuvenil foron convocados polo presidente da Federación Galega de Fútbol, Rafael Louzán, a unha reunión en Santiago na que foron informados das cantidades que lles corresponden en concepto do reparto centralizado dos ingresos procedentes dos dereitos audiovisuais das ligas profesionais.
Esta é a primeira vez que a Federación Galega de Fútbol, mediante a Real Federación Española de Fútbol, realiza este reparto que en total alcanza a cifra de 849.000 euros, o que supón sen dúbida unha gran axuda para todos os clubs beneficiados.
Estas cantidades repártense finalmente do seguinte xeito: 44.000 euros para cada equipos de Segunda División B incluido o Boiro, que descendeu á Terceira División pola vía administrativa a primeiros de xullo, 27.500 euros para cada equipo de Terceira División, 6.000 euros para cada equipo de División de Honra Xuvenil Santiago de Compostela, Pabellón de Ourense, Val Miñor, Areosa e Alondras, 2.500 euros para cada equipo de Liga Nacional Xuvenil.
Tamén se suman as cantidades percibidas por dereitos de televisión polos equipos que participaron na Copa do Rei, que a pasada campaña foron o Racing de Ferrol e o Boiro.
Queda pendente un pequeno reparto para os equipos de fútbol sala e fútbol feminino do que se estará pendente desde a Federación Galega.
Ademais, está sen definir aínda o reparto do 1% do total dos ingresos que lle corresponde ás federacións territoriais. Coñeceranse datos oficiais nas vindeiras datas.